Øll skulu vera koppsett í summar

Allir føroyingar skulu vera liðugt koppsettir fyri COVID-19 um mánaðarskiftið juni/juli.

Tað ætlar koppsetingarbólkurin hjá heilsumyndugleikunum, ið hevur gjørt eina støðulýsing av gongdini frá 30. desember í fjør, til 17. februar í ár.

Nú eru tilsamans 5.355 fólk í Føroyum koppsett. 4.134 fólk eru koppsett fyrru ferð og 1.221 fólk seinnu ferð.

1.200-1.300 skamtar koma næstu dagarnar

Tey trý sjúkrahúsini fáa um vikuskiftið og mánadagin 1.200 - 1.300 fleiri skamtar, sigur Hjalti Gunnarstein, landsapotekari við útvarpið.

Hesa fyrstu tíðina hevur dentur verið lagdur á at koppseta heilsu- og røktarstarvsfólk, búfólk á ellis- og røktarheimum og sjúklingar í serligum vandabólkum og avvarðandi teirra.

Samanumtikið hevur koppsetingin í Føroyum gingið skjótt, undirtøkan hevur verið góð og gagnnýtslan av koppingarevni hevur verið góð, siga heilsumyndugleikarnir í støðulýsing.

Sí støðulýsingina her.