Biden: Kunnu halda tjóðardagin sum vant

Amerikanski forsetin, Joe Biden, helt í nátt sína fyrstu røðu fyri fólkinum, eftir at hann tók við sum forseti.

Og sum so nógva aðrastaðni, snúði røðan seg í stóran mun um koronu.

Hann segði, at útlit eru til, at amerikanarar kunnu hátíðarhalda tjóðardagin 4. juli sum vanligt. Men tað krevur, at fólk halda tilmælini, til øll eru koppsett, segði Joe Biden.

Forsetin hevur skrivað undir hjálparpakkan, sum er 1.900 milliardir dollarar.

Nóg mikið av koppingarevni

Og í mai hevur USA nóg mikið av koppingarevni til øll vaksin, legði forsetin dent á.

Samstundis skulu nógv fleiri koppseta fólk, m.a. djóralæknar og tannlæknar, segði forsetin.

Higartil eru umleið 10 prosent av amerikanarunum koppsett.

Men hann ávaraði eisini um, at stríðið ímóti koronu verri enn so er liðugt, og virða fólk ikki tilmælini, verða krøvini í landinum herd aftur.

Higartil eru 528.000 fólk í USA deyð av koronu, og tað er tað mesta í nøkrum landi.