TAKS: Samherji má hava misskilt okkurt

Fyri fyrstu ferð síðani sendingin, Teir ómettiligu, var send týskvøldið, hevur Samherji i dag gjørt viðmerking til málið. 

Samherji sigur á heimasíðu sínari, at fyritøkan hevur fingið váttað frá TAKS, at eingin kanning er í gongd í Føroyum av Samherja. Hendan útsøgnin kemur í kjalarvørrinum av sendingini, Teir ómettiligu, sum eisini hevur verið lýst í íslendskum miðlum. 

Men Eyðun Mørkøre, stjóri á TAKS, skrivar í viðmerking á Facebook í kvøld, at útsøgnin hjá Samherja ikki er sonn. Hann skrivar, at sjálvandi verður málið, sum var umrøtt í sendingini, kannað av TAKS.

– Eg havi ikki á nakran hátt váttað fyri Samherja í Íslandi, at nakað verður øðrvísi enn tað, eg segði í Degi og viku. Talan má vera um onkra misskiljing, skrivar Eyðun Mørkøre í kvøld.