Góðar royndir við ókruvdum fiski

Í eina tíð hevur Sjógæti tikið ímóti útróðrarfiski á Eiði.

Virkið hevur einar 25 bátar sum avreiða til virkið, sigur Ólavur Høghamar, sum er formaður fyri kryvjingini.

Tey eru farin undir eina skipan, har bátarnir koma til lands við ókruvdum fiski, sum síðani verður kruvdur á landi.

Tað hevur við sær, at tey sum rógva út, bert skulu bløðga fiskin niður í kassar, har ísur og sjógvur er í.

Royndirnar higartil vísa, at fiskurin verður betri, sigur Ólavur Hæøghamar. Og so hevur tað tann fyrimun, at menninir sum eru við bátunum, sleppa undan at kryvja, og tað ger arbeiðið lættari umborð.

Bátarnir fáa kassar umborð við ísi í, og so skal ein ávís nøgd av sjógvi eisini latast í kassan, og so verður fiskurin køldur alt fyri eitt.

Tá fiskurin er avreiddur, verður hann koyrdur í ísvatn, og so kruvdur dagin eftir. Tey kryvja hvønn dag uttan sunnudag.

Tá bátarnir gera klárt at fara avstað aftur, so fáa teir nýggjar kassar umborð.

Skipanin hevur roynst væl, sigur Ólavur Høghamar, formaður fyri kryvjingini hjá Sjógæti.

Sjógæti selur ta nógva av kruvda fiskinum til Fiskavirkið í Gøtu, og har lata tey væl at góðskuni.

Páll Gregersen, stjóri sigur, at fiskurin er góður, men prísurin er nakað hægri enn á vanligum fiski, tí tað er dýrt at kryvja á landi.