Norðurkorea givið avboð til OL

Nú hevur tað fyrsta landið boðað frá, at tey ikki luttaka á Olympisku leikunum, sum eftir ætlanini skulu vera í japanska høvuðsstaðnum, Tokyo, í summar. 

Tað er Norðurkorea, sum nú hevur boðað frá hesum. Orsøkin er, at Norðurkorea vil verja síni ítróttarfólk móti koronufarsóttini, skrivar BBC.

Stýrið í Pyongyang vil vera við, at ongir tilburðir av koronuvirusinum eru í Norðurkorea, men serfrøðingar halda tó sambært BBC, hetta er ivasamt.

Olympisku leikirnir byrja eftir ætlanini fríggjadagin 23. juli, og leikirnir vara til sunnudagin 8. august.