Meirilutin vil bíða eftir landsstýrismanninum

Samgongan í Rættarnevndini mælir frá at samtykkja uppskotið hjá Bjarna Hammer um at javnseta ferðaseðla- og farmaprísirnar

Samgongan tekur ikki undir við uppskotinum hjá Bjarna Hammer, løgtingsmanni, um at javnseta ferðaseðla- og farmaprísirnar. Landsstýrismaðurin í samferðslumálum arbeiðir við nýggjum prísbygnaði

Høgni Djurhuus

14.04.2021 - 09:08

Samgongan heldur tað vera rættast at bíða eftir landsstýrismanninum í samferðslumálum, sum sigur seg arbeiða við einum prísbygnaði fyri Strandfaraskip landsins.

Tí er ikki neyðugt at samtykkja uppskotið hjá Bjarna Hammer, løgtingsmanni, um at javnseta ferðaseðla- og farmaprísirnar, sigur meirilutin í Rættarnevndini, Christian Andreasen, Frimodt Rasmussen, Erhard Joensen og Steffan Klein Poulsen.

Strandfaraskip landsins hava havt somu prísir síðani 2007, tá teir vórðu lækkaðir, sigur meirilutin.

Allar leiðirnir hjá Strandfaraskipum hava undirskot.

Atkvøða í dag

Upplýst verður í álitinum hjá Rættarnevndini, at tyrlurnar hava havt somu prísir síðani 1994.

Minnilutin í Rættarnevndini, Sirið Stenberg, Ingilín D.Strøm og Hervør Pálsdóttir, mælir til at samtykkja uppskotið hjá Bjarna Hammer.

Onnur viðgerð og atkvøðugreiðsla eru á løgtingsfundinum seinnapartin í dag.