Eru í miðal 27 ár, tá tær eiga fyrstu ferð

Kvinnur í Føroyum, sum eiga sítt fyrsta barn, eru næstan hálvt triðja ár yngri enn kvinnur í Danmark, tá tær eiga fyrstu ferð.

Tað sæst í Heilsulýsing landslæknans fyri 2019, sum varð kunngjørd í undanfarnu viku.

Í 2019 var miðalaldurin á kvinnum í Føroyum 27,1 ár, tá tær áttu fyrsta barnið, stendur í heilsulýsingini. Miðalaldurin á kvinnum í Danmark, sum áttu sítt fyrsta barn fyrraárið, var 29,5 ár, ella 2,4 ár eldri.

Í 2019 vórðu 679 børn fødd í Føroyum. 232 vóru børn hjá kvinnum, sum áttu fyrstu ferð.

Miðalaldurin á teimum, sum gjørdust pápar í Føroyum fyrstu ferð, var í 2019 29,8 ár. Í Danmark var tann miðalaldurin 31,5 ár.