Freistin verður kanska longd

Freistin at søkja starvið sum stjóri í Gigni var úti nú á middegi. Men spurningurin er, um hetta er endaliga freistin.

Tí Lønardeildin hjá Fíggjarmálaráðnum hevur biðið Fasta gerðarrættin viðgera trætuna um stjóran á Gigni.

Felagið føroyskir Sjúkrarøktarfrøðingar noktar limum sínum at søkja stjórastarvið.

Fasti gerðarrættur uppí

Hetta sigur Lønardeildin er eitt óheimilað stríðsstig og sendi Gerðarrættinum málið.

Gerðarrætturin hevur fund í dag kl.15.

Í slíkum skundmálum hevur Fasti gerðarrættur 72 tímar frá tí, at hann hevur fingið eitt mál, til úrskurðurin kemur. Teir 72 tímarnir eru farnir í annaðkvøld.

Úrskurðir hjá Fasta gerðarrætti eru endaligir.

Felagið hjá sjúkrarøktarfrøðingunum sigur, at stjórastarvið er ikki lýst sambært sáttmálanum, sum felagið hevur við Fíggjarmálaráðið. Tí noktar felagið limum sínum at søkja.

Bíða eftir úrskurðinum

Egil á Bø, stjóri í Heilsutrygd, sigur, at bíðað verður eftir úrskurðinum hjá Gerðarrættinum, áðrenn avgjørt verður, um freistin at søkja stjórastarvið verður longd.

Elin Ziska hevur sagt seg úr stjórastarvinum. Hon fer 1.mai. Hon er í farloyvi úr einum starvi sum heilsufrøðingur í Gigni.