Samgongan vil broyta uppskotið um miðlastuðul

Uppskotið hjá Jenisi av Rana, landsstýrismanni, um miðlastuðul hevur ikki fulla undirtøku í samgonguni.

Samgongufólkini í Mentanarnevndini mæla til at broyta uppskotið, so 30 prosent av stuðlinum fara til lønir hjá miðlunum.

Eingin miðil ella miðlasamtak eigur at fáa meira enn 40 prosent av teimum 30 prosentunum, siga samgongufólkini.

Hini 70 prosentini fara til verkætlanir. Sambært uppskotinum hjá landsstýrismanninum skulu øll 100 prosentini fara til verkætlanir. 

Mæla til at tvífalda stuðulin

Samgongufólkini mæla eisini til, at broytingin ikki kemur í gildi fyrr enn næsta ár. 

Andstøðan heldur, at játtanin til miðlastuðul, sum nú er tvær milliónir krónur, eigur at hækka upp í fýra milliónir.

Stuðulin til verkætlanir, tvær milliónir, eigur at koma afturat teimum tveimum milliónunum, sum nú eru. Og verandi skipan eigur at verða endurskoðað. 

Andstøðan í Mentanarnevndini mælir løgtinginum til at fella uppskotið um miðlastuðul.