Sadiq borgarstjóri í trý ár afturat

Sadiq Khan heldur fram sum borgarstjóri í bretska høvuðsstaðnum, London.

Khan, sum umboðar Labour, vann á avbjóðaranum, Shaun Bailey, úr Konservativa flokkinum, skriva Reuters og Ritzau.

- Takk fyri, London. Tað er ein heiður at tæna býnum, sum eg eri so góður við, í trý ár aftrat, skrivar Khan á Twitter.

Ferðavinna og arbeiðspláss

Í valstríðnum legði Sadiq Khan dent á ferðavinnuna og at útvega fleiri arbeiðspláss.

Í 2016 varð Sadiq Khan fyrsta muslimska valevnið, sum vann borgarstjórasessin í einum stórum høvuðsstaðni í einum vestanlandi.

Hann tók við sum borgarstjóri eftir Boris Johnson, sum nú er forsætisráðharri í Bretlandi.