Magnus Heinason lýstur til sølu

Gamla havrannsóknarskipið, Magnus Heinason, er nú formliga lýst til sølu.

Havstovan vil ikki siga, hvat ein hóskandi prísur fyri skipið er, tí tað kann órógva sølutilgongdina, sigur stovnurin.

Havstovan brúkti Magnus Heinason sum havrannsóknarskip í 40 ár, frá 1981 til mars í ár, tá skipið varð lagt.

Magnus Heinason gjørdi millum annað trolkanningar, akustiskar kanningar, yngulkanningar, ætikanningar, hydrografiskar kanningar og seismiskar kanningar tey 40 árini, hann varð brúktur.

Magnus Heinason varð bygdur á Langsten-skipasmiðjuni í Noregi í 1978.