Nokta at gera verkfalsrakt arbeiði

Hjálparfólkafelagið noktar limum sínum at taka upp verkfalsrakt arbeiði í sáttmálatrætuni millum Føroya Pedagogfelag øðrumegin og KAF og Fíggjarmálaráðið hinumegin.

Nevndin í Hjálparfólkafelagnum sigur, at limir felagsins eiga at fara til arbeiðis sum vanligt, men at limirnir skulu ikki átaka sær uppgávur, sum annars høvdu verið loystar av limum í Pedagogfelagnum.

Limirnir í Pedagogfelagnum fóru í verkfall klokkan sjey í morgun.

14 undantøk

Almannaverkið fekk í fyrsta umfari lovað 14 undantøk frá Pedagogfelagnum. Stjórin í Almannaverkinum, Edvard Heen, segði við útvarpið í gjárkvøldið, at tey bóðu um 125 afturat, tí tey mettu, at støðan var rættiliga hættislig. Tey fingu tó bara tvey undantøk afturat. Tað vil siga 16 undantøk í alt.

Forkvinnan í MEGD, Tóra við Keldu, heitir í skrivi á partarnar á arbeiðsmarknaðinum at vísa dirvi og finna loysnir. Hon sigur, at nú merkjast stríðsstigini veruliga, og tey veikastu í samfelagnum eru aftur rakt. Hon sigur, at MEGD í fleiri ár hevur heitt á partarnar um at gera virðiligar avtalur, so hetta, sum nú hendir, ongantíð hendir aftur. Tó uttan úrslit, sigur hon.