Fakfeløg avlýsa ætlað tiltøk

Tiltøkini, sum 36 fakfeløg ætlaðu at seta í verk til tess at mótmæla lógarinntrivið í verkfallið, verða av ongum, nú semja er gjørd millum Pedagogfelagið, Kommunala arbeiðsgevarafelagið og Fíggjarmálaráðið um nýggjan sáttmála.

Súni Selfoss, formaður í Starvsfelagnum og talsfólk fyri tey 36 fakfeløgini, sigur, at hóast ætlanin um stríðsstig er slept, merkir tað ikki, at fakfeløgini hava slept endanum.

- Vit fara nú at taka samanum støðuna, og so fara vit at tosa saman um, hvat næsti leikur verður, sigur hann.