Føroyskar prædikur sleppa at vera føroyskar

Eitt uppskot hjá danska kirkjumálaráðharranum, sum hevði havt við sær, at føroyskar meinigheitir í Danmark skulu umseta føroyskar prædikur til danskt, er nú útsett í óasetta tíð. 

Tað skrivar Jyllands Posten.

Joy Mogensen, kirkjumálaráðharri, hevur í fleiri førum útsett málið, tí tað hevur verið ivasamt við undirtøkuni í fólkatinginum, men hesuferð er tað útsett í óásetta tíð.

Endamálið við lógaruppskotinum er at forða fyri islamskari radikalisering, men danska stjórnin hevur verið fyri nógvum atfinningum, eisini uttanfyri Danmark, fyri uppskotið, tí hildið verður, at uppskotið rakar skeivt.

Joy Mogensen vil ikki gera samrøðu um málið, men hon sigur við Jyllands Posten, at korona er orsøkin til, at málið verður útsett.

Hon leggur aftrat, at stjórnin tó ikki hevur slept ætlanini, um at prædikur á øðrum málum enn donskum skulu týðast til danskt, hóast málið nú er tikið av listanum av málum, sum verða løgd fyri Fólkatingið í næstum.