Svøríki linkar koronutiltøkini

Svenska stjórnin hevur gjørt av at linka tiltøkini ímóti koronu, og tey koma í gildi hósdagin.

"Tað gongur støðugt betur," sigur handils- og ídnaðarráðharrin, Ibrahim Baylan, sum saman við heilsumyndugleikunum boðaði frá broytingunum í gjár, skrivar SVT.

Frá hósdegnum kunnu fleiri fólk vera í handlum samstundis, og avmarkingarnar, sum hava verið galdandi við jarnbreytarferðsluni, verða settar úr gildi.

"Fyri tey ferðandi hevur tað framvegis stóran týdning at ansa væl eftir, um tey kenna seg sjúk," sigur ráðharrin.

Heitt verður framvegis á sviar um at halda frástøðu, tí eisini í Svøríki eru tað alsamt fleiri, sum gerast sjúk av Deltaslagnum av koronu, skrivar SVT.