- Tíðindi, mentan og ítróttur
VAR skal brúkast til landsdystir á Tórsvølli
Nú kemur VAR eisini til Føroyar.
VAR stendur fyri Video Assistant Referee verður í framtíðini brúkt til A-landsdystir í fótbólti hjá monnum.
Tað boðar Fótbóltssambandið frá á heimasíðuni.
Sostatt verður HM-undankappingardysturin móti Ísrael á Tórsvølli 1. september søguligur, tí hann verður fyrsti dystur í Føroyum, har VAR verður brúkt.
Seinastu tvey til trý árini hevur VAR verið brúkt í stóru kappingunum kring Evropa og í HM- og EM-endaspølum.
Men nú hevur UEFA avgjørt, at VAR eisini skal brúkast í HM- og EM-undankappingardystum hjá monnnum.
Endamálið við VAR er at hjálpa dómarunum at taka rættar avgerðir.
Hetta verður millum annað gjørt við at geva dómaranum møguleikan at síggja støður umaftur á video, um hann møguliga hava mistikið seg.
