Biden: Rætt at taka herdeildirnar úr Afganistan

Tað var ein røtt avgerð at taka altjóða herdeildirnar úr Afganistan.

Tað segði amerikanski forsetin, Joe Biden, í einari sjónvarpsrøðu í gjárkvøldið.

Tað eru lokalu myndugleikarnir í Afganistan, ið hava svikið, segði amerikanski forsetin.

Góvu skarvin yvir

- Politisku leiðararnir í Afganistan góvu skarvin yvir og flýddu av landinum, og viðhvørt royndi afganski herurin als ikki at berjast. Um nakað, so hevur gongdin seinastu vikurnar styrkt okkum í trúnni um, at tað var ein røtt avgerð ikki at hava nakra amerikanska hernaðarliga uppílegging.

- Amerikanskir hermenn kunnu ikki og skulu ikki berjast í einum kríggi og doyggja í einum kríggi, sum afganskar herdeildir ikki sjálvar vilja berjast fyri, segði Joe Biden í sjónvarpsrøðuni í gjárkvøldið.

Gav endaligu boðini

Tað var Joe Biden, ið gav endaligu boðini um, at amerikanskar herdeildir skuldu taka seg úr Afganistan, eftir at hava verið í landinum í 20 ár.

Fyrrverandi amerikanski forsetin, Donald Trump, sigur, at Joe Biden hevur tapt eitt kríggj, og eigur at leggja frá sær í stundini.