Bretland: Ov fáir lastbilar at flyta matvørur

Bretska samfelagið líður undir eini flutningskreppu, tí ov fáir lastbilførarar eru at flyta mat og aðrar neyðsynjarvørur kring landið, skrivar The Guardian.

Tað hevur við sær, at matvøruhandlar kunnu ikki selja tað, sum er neyðugt, grønmeti rotnar í goymsluhallum, og fleiri matstøð hava stongt, tí eingin matvøra fæst til vega.

Flutningsídnaðurin boðar frá, at tørvur er á minst 100.000 bilførarum at flyta mat- og aðra neyðsynjarvøru kring landið.

Rýmdir undan brexit

Brexit og korona hava fingið nógvar lastbilførarar úr øðrum londum at rýma úr Bretlandi, og samstundis gongur striltið at fáa sett aðrar bilførarar við, skrivar blaðið.

Lastbilførararnir taka ikki undir við sjónarmiðinum um, at brexit og korona eru einasta orsøkin.

- Trupulleikin, sum nú stingur seg upp, botnar í, at lastbilførararnir hava fingið vánaliga løn í nógv ár. Lønin er 10 pund um tíman, og tað fær ikki royndar bilførarar at koyra bilar, sum viga upp í 44 tons, á vánaligu vegunum í Bretlandi, sigur formaðurin í fakfelagnum, Unite, sum er størsta fakfelagið í Bretlandi.