Maðurin, sum royndi at drepa Reagan, verður latin leysur

John Hinckley, sum í 1981 royndi at beina fyri táverandi amerikanska forsetanum, Ronald Reagan, verður skjótt latin leysur uttan nakrar avmarkingar. Tað hevur ein dómari gjørt av, sambært Ritzau.

Avgerðin kemur í gildi í juni næsta ár.

- Hinckley hevur verið fongslaður nóg leingi, sigur dómarin, Paul Friedman, við Reuters-tíðindastovuna. Mett verður ikki, at John Hinckley, sum nú er 66 ára gamal, er til vanda fyri seg sjálvan ella onnur.

Nøkur krøv 

Hóast hann sleppur leysur, verða nøkur krøv sett. M.a. má hann ikki vera nærri ávísum støðum, har politikarar og embætisfólk koma saman, enn eitt vist, og hann má ikki koma nærri barnaheiminum í Williamsburg í Virginia, har mamman býr, enn 80 kilometrar.

John Hinckley fær heldur ikki loyvi at tosa við tíðindafólk, og hann skal arbeiða tríggjar dagar um vikuna.

Hann hevur bundið seg til at tosa við sálafrøðing tvær ferðir um vikuna, so eftirlit kann vera við honum.

Dóttir Reagan stúrin

Dóttir Ronald Reagan, forseta, Patti Davis, skrivar í Washington Post, at hon er ímóti, at John Hinckley verður latin leysur, tí hon stúrir fyri, at hann fer at leita eftir sær, og at hann ikki iðrar seg um tað, sum hann gjørdi.

John Hinckley skeyt Ronald Reagan, forseta, á einum hotelli í Washington 30. mars í 1981. Annað lungað varð rakt, men forsetin kom skjótt fyri seg efttir hendingina.

Tríggir aðrir mans vórðu raktir og særdir, og ein teirra, James Brady, sum var talsmaður hjá Reagan, hevur sitið í koyristóli síðani.