Sjófeingislógin skal eisini umfata deksbátar

Sluppungar eru eisini við í lógaruppskotinum um broytingar í lógini um sjófeingi. 

Í lógini stendur, at fyri at reka vinnuligan fiskiskap, krevst, at tann sum eigur fiskifar, er fólk ella smápartafelag ella felag í Føroyum.

Nú verður skotið upp, at undantak kann gevast frá treytunum um eigaraviðurskifti fyri eldri deksbátar, smíðaðir í Føroyum, so møguleiki er hjá eigarunum at skipa seg í annað enn partafelag ella smápartafelag. 

Hesir deksbátar, sluppungar, hava ofta mentanarsøguligan týdning.

Tí heldur Fiskimálaráðið, at tey, sum varðveita hesar bátarnar, eiga at hava møguleikan at skipa eigaraviðurskiftini í til dømis ein grunn.