Sóknast enn eftir vitnum

Eingi vitni hava vent sær til løgregluna í sambandi við eina hending í Eysturbýnum í Havn næstseinasta fríggjadag.

Ein ungur maður varð funnin umleið kl. 4 hesa náttina á vegamótinum Djóna í Geilgøta/Bókbindaragøta við skaða í andlitinum.

Maðurin varð seinast sæddur uttan fyri Hotel Brandan um hálvgum tvey tíðina fríggjanáttina, men tá hann hálvanannan tíma seinni varð funnin niðarlaga í Eysturbýnum, hevði hann einki vit.

Maðurin er um 20 ára gamal og var í svartari hettutroyggju, svørtum buksum og hvítum skóm. 

Løgreglan sóknast eftir vitnum, sum møguliga kunna siga, hvat er farið fram í tíðarbilinum, frá at maðurin varð sæddur við Hotel Brandan, til hann varð funnin í Djóna í Geilgøtu. 

- Vitnisfrágreiðingar hava týdning fyri kanningararbeiðið hjá løgregluni. Vit mugu vita, hvat er hent, og um talan er um eitt brotsverk, sigur vaktleiðarin á løgreglustøðini, Jóannes Østerø. 

Vitni kunnu venda sær til løgregluna á tlf. 114.