Vilja ikki hava filmsgrunn aftrat verandi skipanum

Samgongan hevur onga ætlan um at stovna nakra nýggja skipan, ella grunn, til filmsvinnuna, men heldur vil samgongan styrkja verandi skipanir, stuðulsjáttanina og afturberingina.

Tað siga samgongufólkini í Mentanarnevndini hjá løgtinginum.

Tey taka ikki undir við uppskotinum hjá Tjóðveldi um at stovna ein filmsgrunn.

Tey siga eisini, at í uppskotinum um fíggjarlóg fyri 2022, eru 100.000 kr. aftrat til at stuðla filmsgerð.

Stuðul og afturbering

Í ár eru 2,9 milliónir almennar krónur til film.

Afturberingarskipanin hevur 200.000 kr.

Meirilutin í Mentanarnevndini, sum er andstøðan, tekur undir við uppskotinum um filmsgrunn.

Sambært uppskotinum skal grunnurin fáa í minsta lagi hálva millión um árið, til hann hevur 10-12 milliónir krónur at lata um árið.