Avstralia fer at høgga kol í nógv ár aftrat

Avstralia fer at høgga, selja og útflyta kol og í nógv ár aftrat.

Tað sigur avstralski ráðharrin í vatni og náttúruríkidømi, Keith Pitt, við ABC News.

Boðini koma eftir, at Avstralia á COP-26 ráðstevnuni ikki vildi binda seg til at gevast við at bróta og nýta kol í nógv ár aftrat.

Meir enn 40 lond skrivaðu undir avtaluna um at minka um kolanýtsluna, fyri at bøta um veðurlagið.

Trý lond vildu ikki skriva undir, Kina, USA og Avstralia, hóast londini nýta nógv kol.

Reinasta kol í heiminum 

- Vit hava verið greið í okkara boðum, og tað er, at vit fara hvørki at gevast við at bróta kol, ella at nýta orkuverk, sum nýta kol, sigur avstralski ráðharrin, Keith Pitt.

Hann vísir á, at kolið úr Avstralia er tað besta og reinasta í heiminum. Og av tí sama verður marknaður fyri kolinum í nógv ár aftrat, sigur hann.

Fara vit ikki at bróta og selja kol, so fer onkur annar at gera tað, sigur ráðharrin.

300.000 fólk í kolavinnuni

Sambært Keith Pitt, starvast 300.000 fólk í Avstralia í kolavinnuni, sum hevur stóran búskaparligan týdning fyri landið.

Stjórnin í Avstralia boðaði í oktober frá, at landið verður CO-2 neutralt fyri 2050. Nógv lond siga seg ivast í tí, um ikki nógv betri tøkni verður fingin til vega, og tað er tað, sum avstralska stjórnin setur sítt álit á, skrivar AFP-tíðindastovan.