Næmingar á Miðnámi á Kambsdali mótmæla koronuhandfaringini

Í einum videobroti gera næmingar á Miðnámi á Kambsdali vart við, at teir eru ónøgdir við, hvussu myndugleikarnir handfara koronustøðuna í løtuni. 

Sum skilst, so ætla fleiri næmingar ikki at møta upp í skúla í dag, fyri at vísa sína ónøgd við koronuhandfaringina. 

Tað er serliga tann sannroynd, at tey ungu verða løgd undir at breiða smittuna út, tí tey møtast í sosialum samanhangum uttan fyri skúlan, ið hevur fingið øði í tey ungu. 

"Myndugleikarnir eru dupultmoralskir," verður millum annað sagt, "tí samstundis sum vit ungu verða biðin um ikki at savnast uttan fyri skúlan, verða vit tvingað saman í skúlanum." 

Átøkini, ið eru gjørd á skúlanum í Kambsdali, fyri at umganga, at smittan breiðir seg, geva onga meining, siga tey, tí allir næmingar hava valfak, sum blanda næmingar úr ymsum flokkum saman.