COP26: Uppskot um avtalu gjørt

COP26-veðurlagsráðstevnan í Glasgow endar í dag, og fyrrapartin var nýtt uppskot um avtalu lagt fyri tey umleið 200 londini, sum eru á ráðstevnuni.

Eftir uppskotinum skulu londini seta meira ferð á ætlanirnar um at gevast við at nýta dálkandi brennievni, og næsta ár skulu londini so hittast aftur at nærri at greiða frá, hvussu útlátið av veðurlagsgassum kann minka.

Tað skrivar The Guardian.

Øll londini, sum eru á ráðstevnuni, skulu góðkenna avtaluna, og tey skulu samstundis binda seg til at stuðla fátæku londunum,  sum longu stríðast við veðurlagsbroytingarnar, skrivar BBC.

Fyrr í vikuni var eitt uppskot til semju lagt fram, men hetta uppskotið hevur veikari orðingar um, hvussu og nær lond skulu gevast at nýta dálkandi brennievni.