Magdalena Andersson skal skipa nýggja stjórn

Nýggja forkvinnan í sosialdemokratiska flokkinum í Svøríki, Magdalena Andersson, hevur nú fingið litið upp í hendur at skipa nýggja stjórn.

Tað boðar formaðurin í ríkisdegnum, Andreas Norlén, frá, eftir at Stefan Løfven, forsætisráðharri, í gjár bað formannin í ríkisdegnum um at sleppa at leggja frá sær sum forsætisráðharri.

Magdalena Andersson varð í farnu viku vald til forkvinnu í sosialdemokratiska flokkinum eftir Stefan Løfven, sum í august boðaði frá, at hann fór at gevast í politikki.

Løfven var floksformaður í næstan 10 ár, og hann verður sitandi sum forsætisráðharri, til ein nýggjur er valdur.

Andersson hevur freist til 16. november at skipa stjórn, sum ríkisdagurin skal atkvøða um. Stjórnin verður vald, um ikki ein meiriluti atkvøður ímóti.

Verður Magdalena Andersson vald, verður hon forsætisráðharri, til ríkisdagsvalið verður næsta heyst. Hon verður eisini fyrsti kvinnuligi stjórnarleiðarin í Svøríki.