Koronustøðan í Evropa álvarslig

Tað er ikki bara í Føroyum, at koronufarstóttin aftur herjar við miklari megi. 

Eisini í 10 ES-londum er støðan hættislig, sigur ECDC, sum er evropeiski stovnurin fyri fyribyrging. 

Tey 10 londini, har støðan verður mett at vera hættislig, eru Belgia, Bulgaria, Estland, Grikkaland, Holland, Kroatia, Tjekkia, Ungarn, Poland og Slovenia.

Samstundis er metingin hjá stovninum, at talið av smittaðum og deyðum, fer at økjast við eini helvt næstu tvær vikurnar.

Hvar Danmark er á stiganum, verður einki sagt um, men herfyri var koronustøðan í Danmark ikki mett at vera nøktandi.

Hollandi letur aftur

Í Hollandi er støðan somikið ring, at stjórnin hevur gjørt av, lutvíst at lata samfelagið aftur.

Tað hevur við sær, at matstovur og handlar skulu steingja tíðliga. Skeinkistøð skulu lata aftur kl. 20, og tað mugu handilsmiðstøðir eisini. Aðrir handlar skulu lata aftur kl. 18.

Fólk fáa ikki atgongd til ítróttartiltøk, fólk vera biðin um í mest møguligan mun at arbeiða heimanífrá, og ikki fleiri enn fýra fólk mugu koma á vitjan samstundis, eru boðini frá hollendska forsætisráðharranum, Mark Rutte.

Í fyrstu syftu eru boðini galdandi í tríggjar vikur, skrivar DR.