ES herðir tiltøkini móti Hvítarusslandi

Uttanríkisráðharrarnir í ES fara væntandi í dag at samtykkja nýggj tiltøk móti Hvítarusslandi, m.a móti almenna flogfelagnum í landinum, Belavia. 

Hetta verða fimtu tiltøkini, sum ES setur í verk, síðani umstrídda valið í Hvítarusslandi í august í fjør.

Tiltøkini móti Belavia verða sett í verk, tí flogfelagið skal hava flutt flóttafólk og tilflytarar úr Miðeystri til Minsk. 

Haðani eru tey flutt víðari til markið móti ES-londunum Póllandi, Lettlandi og Litava.

Sagt verður, at hvítarussiski forsetin, Aleksandr Lukasjenko, ger hetta sum aftursvar til revsitiltøkini, sum ES frammanundan hevur sett í verk móti stýrinum í Hvítarusslandi.

Túsundtals fólk standa nú við markið og sleppa ikki víðari, tí Pólland sýtir fyri at lova teimum inn í landið.