Trailari rakti gentu við Streymin

Ein 12 ára gomul genta varð í gjárkvøldið rakt av einum trailara oman fyri Magnstøðina við Streymin.

Skaðin, sum gentan fekk, var somikið álvarsligur, at hon varð flutt á ríkissjúkrahúsið í Keypmannahavn í gjárkvøldið, upplýsir løgreglan.

Løgreglan upplýsir, at málið verður framvegis kannað, og at tað tekur tíð, tí fólk, sum vóru tætt at hendingini, hava tørv á sálarligari hjálp.

Løgregla og sjúkrabilur vóru í nánd

Løgreglan fekk boð um hendingina stutt eftir klokkan fimm í gjár. Bæði løgreglubilur og sjúkrabilur vóru skjót á staðið, tí teir vóru í nánd, har vanlukkan hendi.

Tað var myrkt í økinum, og tí er ikki lætt at siga, hvat orsøkin til óhappið var, sigur vakthavandi á politistøðini.

Tí hevur løgreglan fleiri viðurskifti at kanna, áðrenn nøkur niðurstøða kann gerast.

Tá slíkar vanlukkur henda, er vanligt at bilurin verður kannaður á Akstovuni, og tað verður eisini gjørt í hesum førinum, tí bæði vognurin og stýrhúsið eru flutt til Akstovuna til kanningar, upplýsir vakthavandi.