Høvdu ikki ráð at gera royndir við el-bussi

Tórshavnar kommuna hevði ikki ráð til at gera royndir við einum el-bussi í november 2019. 

Tað kemur fram í frágreiðing frá Mariusi Müller, leiðara á byggimálsdeildini.

 Gundurs Bussar vóru annars til reiðar við einum tilboði, og el-bussurin kundi fáast til vega eftir hálvum ári.

Leiðarin á byggideildini vísir á í frágreiðingini, at tað bar ikki til at finna fígging til at keypa el-bussin, sum kostaði góðar tríggjar milliónir krónur umframt mvg.

Harumframt skuldu íløgur gerast í eina løðistøð og vanligan rakstur.

Ein roynd var gjørd at leiga ella leasa ein el-buss, men eingin bussur var tøkur, og so var ætlanin slept. 

Hoyr samrøðu við Elsu Berg, býráðslim í Tjóðveldi, her.

Í einum tíðindaskrivi, sum kom fyri løtu síðani, sigur Heðin Mortensen, borgarstjóri,  at ongin samgonga hevur sett so nógvar pengar av til grøna økið sum sitandi samgonga.

Hann vísir aftur, at kommunan fer at keypa diesel- ella el-bussar í óðum verkum, uttan at kanna málið fyrst.