Vit eru virkin í frítíðini

So at siga allir føroyingar eru virknir í frítíðini.

Tað vísir kanningin, sum eitur "Framtíðar frítíðarvanar og savningarstøð í Føroyum."

Hon verður løgd fram á ráðstevnu í Norðurlandahúsinum í morgin. Har eru øll áhugað vælkomin, men neyðugt er at melda til.

Sambært kanningini eru bara fýra prosent av vaksnum føroyingum, sum hvørki íðka ítrótt ella ganga til frítíðarítriv. 

65 prosent ítrótt og frítíðarítriv

Kanningin vísir, at 65 prosent av teimum vaksnu bæði íðka ítrótt og ganga til frítíðarítriv.  24 prosent íðka bara ítrótt, og sjey prosent ganga bara til frítíðarítriv.

Fleiri kvinnur enn menn íðka bæði ítrótt og ganga til frítíðarítriv.

Idrættens Analyseinstitut gjørdi kanningina fyri Kommunufelagið, nakrar av størstu kommununum í Føroyum, Uttanríkis- og Mentamálaráðið, ÍSF, Føroya ungdómsráð, Fróðskaparsetrið, Fólkaheilsuráðið og Lokale og Anlægsfonden.