- Tíðindi, mentan og ítróttur
Ken Nónklett verður kanningarstjóri
Ken Nónklett, advokatur, er í dag tilnevndur kanningarstjóri at kanna, um Jacob Vestergaard, fyrrverandi landsstýrismaður í fiskivinnumálum, hevur umsitið sítt málsøki á lógligan hátt í sambandi við útlutingar av fiskirættindum í 2020 og 2021.
Tað hevur Jógvan á Lakjuni, løgtingsformaður gjørt av.
Setanin av kanningarstjóranum hevur tikið heldur drúgva tíð, men høvuðsorsøkin er, at arbeiðssetningurin hjá kanningarstjóranum er skerdur samanborið við upprunaligu umbønina frá 15 tingmonnum í oktober 2021, sigur løgtingsformaðurin.
Ikki grundarlag at kanna onnur tíðarskeið
Løgtingsumsitingin gjørdi vart við, at grundarlag var ikki fyri at seta kanningarstjóra at kanna umbidnu tíðarskeiðini 2010 og frameftir, eins og tíðarskeiðið 2018-19.
Løgtingsformaðurin hevur síðan havt fundir við umboð fyri teir 15 tingmenninar, sum hava latið løgtingsformanninum hetta ískoyti til upprunaligu umbønina.
Løgtingsformaðurin hevur nú gjørt av, at kanningarstjóri bara verður settur at kanna tíðarskeiðið 2020-21. Avgerð um hetta er send umboðum fyri tingmenninar.
Kanningarstjórin, Ken Nónklett, kann nú fara undir kanningina, sigur Jógvan á Lakjuni, løgtingsformaður.
Arbeiðssetningurin hjá kanningarstjóranum er skerdur, og hann fer bara at kanna umsitingina hjá Jacobi Vestergaard, fyrrverandi landsstýrismanni, í sambandi við útluting av fiskirættindum í 2020 og 2021. (Mynd: Bjarni Árting Rubeksen)