Fyribils vápnahvíld í Ukraina

Fjórða dagin á rað boðar Russland frá, at fyribils vápnahvíld kemur í gildi í ávísum pørtum av Ukraina, so flóttafólk kunnu fara úr býum, eftir ávísum vegum.

Tað sigur tíðindamaðurin hjá DR, Kristian Almblad, sum er í Lviv.

Hann sigur, at vápnahvíldin kemur í gildi kl. sjey føroyska tíð, og skal vara í nakrar tímar.

M.a. verða høvuðsstaðurin Kyiv og Mariupol nevndir, har fleiri royndir eru gjørdar at fáa fólk úr býnum.

Í gjár vísti Ukraina einum uppskoti um vápnahvíld aftur, tí fólkini, sum kundu fara úr nøkrum býum, høvdu bert atgongd at fara til Russlands ella til Hvítarusslands.

Og so lógu minur á vegnum úr Mariupol, upplýsa hjálparfelagskapir.

Prísurin kann hækka munandi

Fleiri leiðarar kring heimin hava umrøtt møguleikan at gevast við at keypa olju og gass úr Russlandi, fyri at leggja trýst á landið. Men tað fer at fáa álvarsligar avleiðingar fyri heimin, sigur ein talsmaður fyri russisku stjórnina.

- Gevast lond at keypa olju úr Russlandi, so fer prísurin at hækka upp í 300 dollarar fyri tunnuna, sigur virkandi forsætisráðharrin í Russlandi, Alexander Novak.

Hann leggur aftrat, at um tað verður gjørt, so tilskilar Russland sær rætt til at steingja fyri gassleiðingini Nord Stream 1, sum er ein av størstu orkuleiðingunum til Evropa.