Breddin: Kríggið í Ukraina og matvørutrygd

Í sendingini í dag verður spurt um matvørutrygdina í Føroyum, og um vit kunnu fáa meira burtur úr egnum matvørutilfeingi

Matvøruprísirnir hækka støðugt, men kunnu vit fáa meira burtur úr okkara egna matvørutilfeingi, verður spurt í Breddanum í dag.

Mynd: Bjarni Árting Rubeksen

Tróndur Olsen

25.03.2022 - 09:15

Matur og matvørutrygd er aftur vorðin ein spurningur, síðani Russland gjørdi innrás í Ukraina. Tí hóast russisku bumburnar hvørki raka okkum, ella nær við, so merkjast búskaparligu avleiðingarnar hjá okkum og alla aðrastaðni.

Matvøruprísirnir fara beint uppeftir, tí nú er tað ikki bara inflasjónin, sum ger alt dýrari. Matvøruframleiðslan er undir trýsti, tá stóru kornmarkirnar í Ukraina eru krígsherjaðar, og landið hevur sett í verk útflutningsbann. Haraftrat hevur Russland avmarkað kornútflutningin.

Men hvussu er við matvørutrygdini í Føroyum, ber til at gerast meira sjálvstøðug, ella fáa vit í heila tikið nóg mikið burtur úr teimum framleiðslumøguleikum og tilfeinginum, sum eru í Føroyum?

Í sendingini verður hugt at matframleiðsluni frá landbúnaðinum í Føroyum, nú matprísirnir kring okkum hækka í hvørjum.

Breddin í útvarpinum klokkan 10.