300 lík funnin uttan fyri Kyiv

Umleið 300 sivilfólk eru funnin deyð í Butsja, uttan fyri høvuðsstaðin Kyiv, nú ukrainskar deildir hava tikið høvuðsstaðin og Kyiv-landspartin aftur frá russum.

Lík eru funnin í gøtunum, og borgarstjórin í Butsja sigur, at umleið 300 fólk eru jarðað í hópgravir.

Vitalij Klitsjko, borgarstjóri í Kyiv, sigur, at tað, sum er hent í Butsja og øðrum forstøðum uttan fyri Kyiv, er fólkamorð.

- Hetta eru ræðuligar krígsbrotsgerðir, sum russiski forsetin, Vladimir Putin, hevur ábyrgdina av, sigur hann.

Uttanríkisráðharrin í Ukraina, Dmytro Kuleba, sigur, at hópdrápið í Butsja var framt við vilja.

Vil hava altjóða revsidómstólin uppí

- Endamálið hjá russum var beina fyri so nógvum ukrainum sum til bar. Vit mugu steðga teimum og reka teir av landinum. Eg krevji, at G7-londini seta strangari tiltøk í verk móti Russlandi, sigur hann.

Reuters skrivar, at hann hevur sent ein fyrispurning til altjóða revsidómstólin í Haag um at kanna málið.

Tíðindastovan skrivar, at fleiri av dripnu sivilfólkunum høvdu verið til handils, ella vóru á súkklu, og eingin teirra var í hermannabúna, tá russar søktu at teimum.

Dmytro Kuleba, Ukraina

Frítekst tagging: 

Dmytro Kuleba

Ukraina

Dmytro Kuleba, ukrainskur uttanríkisráðharri.

Skulu dragast til svars

Bretski uttanríkisráðharrin, Liz Truss, sigur, at hon er skelkað av tí, sum er hent í Butsja. 

- Vit royna saman við øðrum londum at savna prógv, og vit taka undir við, at altjóða revsidómstólurin kannar málið. Tey, sum hava ábyrgdina, skulu dragast til svars, sigur hon.

Forsetin í ES, Charles Michel, fordømir eisini hópdrápini Butsja. Hann sigur, at ES tekur undir við Ukraina og øðrum, sum royna at savna prógv, ið kunnu brúkast í altjóðadómstólum.