Sri Lanka: Skjóta eftir mótmælisfólkum

Vápnaðu deildirnar í Sri Lanka hava fingið boð um at skjóta eftir mótmælisfólkum fyri at tryggja lóg og landaskil.

Tað upplýsir ein talsmaður fyri verjumálaráðið, skrivar Reuters.

Boðini koma eftir ógvuslig mótmælir seinastu tíðina, og sum í gjár høvdu við sær, at fólk lógu eftirá, og at fleiri hundrað vórðu særd.

Útgonguforboð

Mótmælini halda fram, hóast útigonguforboð er lýst í øllum landinum.

Herfólk í túsundatali hava í dag fingið boð um at fara til høvuðsstaðin, Colombo, at tryggja lóg og landaskil.

Støðan er ring í Sri Lanka, tí landið er mestsum farið á húsagang, og tørvur á bæði mati, olju og øðrum neyðsynjarvørum.

Mæla frá at fara til Sri Lanka

Støðan í Sri Lanka verður mett at vera so ring, at danska uttanríkisráðið ræður fólki frá at fara til landið, um ferðin ikki er alneyðug.

Undantaksstøða er lýst í høvuðsstaðnum, og hon er eisini galdandi fyri meginpartin av landinum, upplýsir danska uttanríkisráðið.

Í gjár legði forsætisráðharrin í landinum, Mahinda Rajapaksa, frá sær, men tað hevur ikki broytt framferðina hjá mótmælisfólkunum, sum hava gjørt stóran skaða á almennar bygningar.

Tað hevur fingið stjórnina at geva boð um at skjóta eftir mótmælisfólkum, sum gera seg inn á almennar ognir, skrivar Reuters.