Zelenskyj boðin á NATO-toppfund

Ukrainski forsetin, Volodymyr Zelenskyj, er boðin við á NATO-toppfund í Madrid um tvær vikur.

Tað váttaði Jens Stoltenberg, aðalskrivari í NATO, á tíðindafundi fyrrapartin.

- Ukrainski forsetin verður boðin við at hitta ríkis- og stjórnarleiðarar í NATO. Hann er vælkomin. Berst honum frá at koma, fer hann at tosa við teir á video-fundi, segði Stoltenberg.

Nato-toppfundurin fer at samtykkja størri stuðulspakka til Ukraina. Pakkin skal millum annað hjálpa Ukraina at fáa nýggja útgerð, sum er á NATO-stigi, segði Jens Stoltenberg á tíðindafundinum.

- Tað hevur týdning, at hetta verður gjørt í tøttum samstarvi við Ukraina, hvat slag av vápnum, talan verður um, hvussu tey skulu fáast til Ukraina, um venjing at brúka útgerðina og at røkja hana, so at hon ger so góðan mun á hermótinum sum til ber, segði Stoltenberg.