Evropeiskir leiðarar á veg til Kyiv at hitta Zelenskyj

Fýra evropeiskir ríkis- og stjórnarleiðarar eru á veg til Kyiv at vitja ukrainska forsetan, Volodymyr Zelenskyj.

Teir eru týski samveldiskanslarin, Olaf Scholz, franski forsetin, Emmanuel Macron, italski forsætisráðharrin, Mario Draghi, og rumenski forsetin, Klaus Iohannis.

- Hetta er ein sera umráðandi dagur hjá Zelenskyj og ein týðandi fundur, sigur Rasmus Tantholdt, tíðindamaður hjá donsku sjónvarpsstøðini TV2.

Nógv verður gitt,  men ikki er greitt, hvat fundurin fer at snúgva seg um.

Minsk-2

- Summi stúra fyri, at ES-leiðararnir vilja leggja trýst á Zelenskyj um at gera onkra friðaravtalu, men tað hava ukrainar ikki áhuga fyri. Týskland og Frakland spældu ein avgerandi leiklut í avtaluni um Minsk-2, sigur Rasmus Tantholdt.

USA, Russland, Ukraina, Frakland og Týskland gjørdu hesa avtaluna í 2015 fyri at fáa vápnahvíld í Donbas har eysturi í Ukraina, har landspartarnir Luhansk og Donetsk eru.

Avtalan er tó ongantíð endaliga sett í verk, og ukrainar stríðast nú av øllum alvi fyri at forða russarum at taka Donbas.