Inger Støjberg stovnar nýggjan flokk

Fyrrverandi danski ráðharrin í integratiónsmálum, Inger Støjberg, stovnar nú nýggja flokkin Danmarkardemokratarnir.

Tað váttar hon fyri Skive Folkeblad, skrivar TV2.

Inger Støjberg sigur, at hon serliga fer at varpa ljós á økini, sum eru uttan fyri Keypmannahavn, heilsuøkið og viðurskiftini hjá fyritøkum.

Sostatt er eisini greitt, at fyrrverandi ráðharrin hjá Vinstraflokkinum fer at leggja seg eftir øðrum tingum enn stranga útlendingapolitikkinum, sum hon annars boðaði frá.

Inger Støjberg og Danmarkardemokratarnir eru nú í ferð við at útvega tær 20.182 váttaninar, ið skulu til fyri at kunna stilla upp á næsta fólkatingsvalinum.

Støjberg hevur boðað frá, at hon úttalar seg meira um stovningina á døgurða í dag.