í mesta lagi 500 springarar

Tað sigur nýggja hámarkið, sum kemur í kjalarvørrinum á eftirmetingini hjá landsstýrinum eftir springaradrápið í Skálafirði í fjør, tá ið 1423 springarar vórðu hildnir til.

Landsstýrismaðurin í fiskivinnumálum hevur í vikuni sent uppskot um broyting í grindakunngerðini til hoyringar, og er nýggja hámarkið er eitt fyribils átak.
 
Føroyar hava heitt á vísindanevndina hjá NAMMCO um eitt tilmæli um burðardygga springaraveiðu, ið væntandi verður tøkt í 2023 ella 2024.

Tá ið metingin hjá NAMMCO er tøk, verður hámarkið eftir ætlan tillagað.

Landsstýrið staðfestir í sama viðfangi, at føroyingar eiga rættin at gagnnýta tilfeingið í havinum burðardygt, eisini hval og springara.

Føroyingar hava altíð livað av tí, sum havið gevur, og tilverugrundarlagið hjá Føroyum er grundað á eina burðardygga gagnnýtslu av havinum.

Hvalaveiða í Føroyum er eitt gott íkast til húsarhald í Føroyum.

Hetta er matur, sum hevur eina lutfalsliga lága kolevnisslóð, og møguleikin at veiða hval hevur týdning í mun til matvørutrygdina hjá føroyska samfelagnum.