Finst at kunningini hjá Atlantic Airways

Finst at kunningini hjá Atlantic Airways
- Tað er ov galið, at kunningin hjá Atlantic Airways ikki er betri, sigur Dánial Hoydal, sum saman við fleiri øðrum ferðafólkum úr Keypmannahavn endaði í Reykjavík.
Flogferðslan seinastu dagarnar hevur verið nógv darvað av bæði mjørka og illveðri. Ferðafólk finnast at flogfelagnum fyri vantandi kunning.
Mynd: Bjarni Árting Rubeksen  
 
12.07.2022 - 12:59
1538386

- Tað er ov galið, at kunningin hjá Atlantic Airways ikki er betri, tá ið órógv kemur á flogferðsluna, sum nú, tá ið illveður er. Tað sigur Dánial Hoydal, sum mánadagin skuldi koma til Føroya úr Keypmannahavn, men sum mánakvøldið endaði í Íslandi.

Saman við hinum ferðafólkunum mátti hann liggja nátt í Íslandi, men frá Atlantic Airways kom eingin kunning um, nær ferðafólkini í Íslandi sluppu úr Íslandi aftur.

- Trupulleikin var, at tá vit fóru úr flogfarinum, fingu vit einki at vita. Vit vóru koyrd út í ein buss og koyrd til eitt hotel, men har vóru vit eisini slept upp á fjall. Tí eingin á hotellinum visti nakað, hvørki um mat, drekka ella nær, vit skuldu flúgva aftur. 

- Vit fingu eitt SMS, um at eitt flogfar skuldi flúgva klokkan 8 í morgun, men á hotellinum var kunningin, at einans ein bussur skuldi koyra, og hann koyrdi fyrst klokkan 7.45. So har fór panikkur í øll, sigur Dánial Hoydal.

Strandaðu ferðafólkini í Íslandi royndu eisini at ringja til føroyska flogfelagið, men heldur ikki har fekst nøkur kunning, tí vónleyst var at sleppa ígjøgnum.

- Tað undrar meg, at tey ikki megna at loysa samskiftistrupulleikarnar. Mjørkið er einki nýtt fenomen í Føroyum. Seinkingar mugu og kunnu vit liva við, men kunningina eiga vit at fáa, segði Dánial Hoydal ein stutta løtu áðrenn, hann fór umborð á flogfarið til Føroya í morgun.

Harmast um støðuna

Stjórin í Atlantsflogi, Jóhanna á Bergi, sigur, at veðrið hevur darvað ferðsluna nógv seinastu dagarnar, og umleið 3.500 fólk eru ikki komin við ætlaðu fráferðini, tí 20 flogfør ikki eru komin ella farin til tíðina. 

- Vit harmast almikið um støðuna. Vit hava stórar avbjóðingar, nú tá veðrið er so keðiligt, sigur Jóhanna á Bergi. 

Jóhanna á Bergi, Johanna á Bergi

Caption: 
Jóhanna á Bergi er stjóri í Atlantsflogi.
1538406

Tá órógv er á flogferðsluni, hongur kunningin til ferðafólkini saman við, hvørji flogfør eru tøk at flúgva. Tí fær flogfelagið ikki sent nærri kunning út til ferðafólkini, fyrr enn onnur flogfør eru lend. 

- Áðrenn vit vita meira um, nær eitt flogfar kann heinta strandað ferðafólk, má flogfarið fyrst lenda. So tá flogfør ikki lenda, men heldur venda við aftur, henda aftur broytingar í kunningini, greiðir stjóran frá og leggur afturat, at flogfelagið harmast um støðuna hjá ferðafólkunum í Íslandi, sum kendu seg slept upp á fjall.

Atlantic Airways hevur samstarvsfelagar á ferðamálunum hjá flogfelagnum, og hesir skulu eitt nú traðka til og hjálpa, tá ferðafólk tørva gisting, mat og bussflutning. 

- Tað er ein stjór avbjóðing hjá samstarvsfelagunum at finna bæði gisting og bussar, tí vit eru í háárstíð. Trýstið er stórt á allar skipanir í løtuni, sigur Jóhanna á Bergi.

Stjórin í Atlantic Airways veit ikki at siga, nær flogferðslan kemur í rætt lag aftur.

Er kopiera
Nýggjastu sendingar í ÚV
Hósdag 28. mars
Ein sangur til dirvi
172633
Hósdag 28. mars
Lesikrókurin: Staklutirnir
172944
Hósdag 28. mars
Úr Koltri til Kirkjubøar (1:2)
172479
Nýggjastu sendingar í SV
Hósdag 28. mars
Skírishósdagur: Tummas Kannuberg
172799
Hósdag 28. mars
Hin rusuti á Aconcagua
172934
Hósdag 28. mars
Guðstænasta úr Kollafjarðar kirkju
172938
Mikudag 27. mars
Frætt og fregnað 1 (1:3)
40584
Mikudag 27. mars
Frætt og fregnað 1 (2:3)
40585