Ítøkiligar ætlanir um Suðuroyartunnilin

Suðuroyartunnilin er farin at nærkast veruleikanum, í hvussu so er sambært røðuni hjá løgmanni í løgtinginum í dag.

Hann segði, at landsstýrið arbeiðir við at fyrireika ætlanina um at gera ein suðuroyartunnil. 

Ymiskir møguleikar eru kannaðir viðvíkjandi linjuføringum. 

Ætlanin er at mæla til eina linjuføring, sum leggur upp fyri kostnaði, trygd og framtíðar vegakervi sum heild.

Jarðfeingi hevur gjørt tilmæli til Landsverk um, hvørjar jarðfrøðiligar kanningar eiga at vera gjørdar fyri at hava eitt haldgott grundarlag at fara undir verkætlanina, sigur løgmaður. 

Hann sigur, at hildið verður fram at gera forkanningar og fyrireika tunnilin. 1,8 mió. krónur eru tøkar í ár. 

100 milliónir um árið

Landsstýrið hevur sett 100 mió. kr. av til tunnilin frá 2025 og frameftir í langtíðarløguætlanini. 

Eisini eru játtaðar fýra mió. kr. í ár til at stovna partafelagið Suðuroyartunnil.

Fyribils er mett, at tað fer at taka okkurt um átta ár at byggja tunnilin. 

Tá eru fyrireikingar, undankanningar og prosjektering ikki taldar við. 

Ætlanin er at gera lógaruppskot komandi tingár, sum gevur heimild at gera forprojekt og eitt møguligt endaligt projekt, sum er klárt at bjóða út.