Skrúðgonga, gudstænasta, kórsangur og tingseta

Tað er ólavsøkudagur og nú klokkan 11 er ólavsøkuguðstænastan. 

Tað verður Havstein Klein, sóknarprestur í Sandoy, sum fer at halda prædikuna í Havnar kirkju, tá ið løgtingsfólk, landsstýrisfólk, prestar og embætisfólk ganga skrúgongu og fara í kirku, áðrenn Løgtingið verður sett.

Tað er tann elsti av teimum yngru prestunum í embæti í føroysku fólkakirkjuni, sum ikki fyrr hevur prædikað á ólavsøku, ið prædikar í Dómkirkjuni ólavsøkudag.

Ikki færri enn 10 sóknarprestar standa í røðini at prædika á fyrsta sinni ólavsøkudag. Elstur av teimum við atliti til starvsaldurin er Havstein Klein, sóknarprestur í Sandoy.

Havstein Klein varð liðugur at lesa guðfrøði í Norra í 2007, og hann varð innsettur sum prestur í føroysku fólkakirkjuni í januar 2014.

Eftir guðstænastuna, ganga prestar, løgtingsfólk, landsstýrisfólk og embætisfólk frá kirkjuni niðan til løgtingið, har kórsangur verður á tinghúsvøllinum, og síðan kemur tingið saman, har ólavsøkurøða løgmans er á skránni. 

Bæði útvarpið og sjónvarpið hjá kringvarpinum senda frá guðstænastuni klokkan ellivu og frá tinginum, tá tað verður sett klokkan eitt.