Amerikanarar hava dripið leiðaran í al-Qaeda

USA hevur beint fyri leiðaranum í al-Qaeda, Ayman al-Zawahiri. Álopið var framt í afganska høvuðsstaðnum, Kabul, sunnunáttina okkara tíð.

Tað segði amerikanski forsetin, Joe Biden í nátt.

Sambært Joe Biden fekk eingin í familjuni hjá Ayman al-Zawahiri skaða í álopinum, og eingi sivilfólk doyðu, skrivar danska kringvarpið.

Ein talsmaður fyri Taliban váttar fyri Reuters, at ein bústaður í Kabul var álopin um vikuskiftið.

Taliban fordømir

Taliban, sum hevur valdið í Afganistan, fordømir atsóknina og sigur hana vera brot á altjóða meginreglur.

Hinvegin sigur amerikanski forsetin, at USA hevur gjørt fólki eina stóra tænastu við at drepa mæta leiðaran í al-Qaeda.

Sambært Joe Biden, hevði Ayman al-Zawahiri ein týðandi leiklut, tá ið yvirgangsatsóknini 11. september í 2001 var fyrireikað.