Berlusconi ætlar at stilla uppaftur

Silvio Berlusconi ætlar at bjóða seg fram aftur sum valevni til tjóðartingsvalið í Italia 25. september. 

Tað skrivar danska kringvarpið.

Silvio Berlusconi er 85 ára gamal, og hevur verið forsætisráðharri í Italia í trimum umførum, frá 1994 til 1996, frá 2001 til 2006, og aftur frá 2008 til 2011.

Berlusconi, sum er formaður fyri høgrapopulistiska flokkin, Forza Italia, hevur sambært týsku tíðindastovuni, DPA, sagt, at hann hevur fingið nógvar áheitanir frá fólki um at bjóða seg fram sum valevni, og tað fer hann at gera.

Hann hevur sitið í tjóðartinginum í nógv ár, men í 2013 samtykti senatið at koyra Silvio Berlusconi úr tjóðartinginum eftir dómin, hann fekk fyri skatta-svik.

Á tjóðartingsvalinum fer Forza Italia í samgongu við høgravendu flokkarnar, Fratelli d'Italia, ið merkir italskir brøður, og Liga.