- Tíðindi, mentan og ítróttur
Søkja eftir vinnu- og mentanarstjóra í Klaksvík

Nú verður lýst eftir nýggjum vinnu- og mentanarstjóra í Klaksvíkar kommunu.
Starvið er áramálssett í fimm ár.
Í lýsingini stendur millum annað, at vinnu- og mentanarstjórin skal stuðla býráðnum í at seta dagsskránna og megna at halda visjónir og møguleikar í miðdeplinum, í samstarvi við borgarar og vinnu- og mentanarlívið í kommununi.
Vinnu- og mentanarstjórin myndar leiðsluna í kommununi saman við borgarstjóranum, kommunustjóranum, trivnaðarstjóranum og tekniska stjóranum.
Lønt í 36. lønarflokki
Starvið verður lønt í 36. lønarflokki hjá Tænastumannafelagi Landsins, tó uttan at vera tænastumannastarv. Harumframt verða 15% goldin í eftirlønargjaldi. Stjórin hevur tilvísing til kommunustjóran.
Av tí at starvið er áramálasett, verður ein áramálsviðbót latin.
Starvið verður sett 1. november, ella eftir nærri avtalu.
Eirikur í Jákupsstovu hevur verið vinnu- og mentanarstjóri síðani 1. januar 2019. Hann varð eisini áramálsettur í fimm ár, men avgjørdi herfyri at siga seg úr starvi, nú hann skal vera skrivari í Tjóðveldi.
