Fara at screena fyri tarmkrabba

Screening fyri tarmkrabba kemur í Føroyum næsta ár ella í 2024.

Tað sigur Kaj Leo Holm Johannesen, landsstýrismaður, í svari til Sirið Stenberg, løgtingskvinnu.

Hon spurdi um nýggju krabbameinsætlanina.

Krabbameinsráð

Kaj Leo Holm Johannesen sigur, at eitt tvørfakligt krabbameinsráð verður væntandi sett í næstum. 

Tá ráðið er farið til verka, fer landsstýrismaðurin at dagføra og víðka verandi screeningar í heilsuverkinum. 

Her verður hugsað um bæði bróstscreening og screening fyri lívmóðurhálskrabba.

Sálarfrøðingur og kliniskur sexologur

Landsstýrismaðurin sigur eisini, at hann hevur raðfest tilmælið í krabbameinsætlanini um at seta sálarfrøðing og kliniskan sexolog í fast starv í Sjúkrahúsverkinum.

Arbeiðið at gera eina fólkaheilsuætlan byrjar í heyst.

Seinni í ár vera serlæknar í nýrasjúkum og tarmsjúkum settir, sigur Kaj Leo Holm Johannesen.