Oljustuðul hjálpir ikki nóg mikið á brekøkinum

Fátækradømið á brekøkinum í Føroyum fer at hækka serliga nógv, um ískoytið frá landinum, nú kostnaðir hækka so nógv, verður avmarkað til 7.000 kr í oljustuðuli.

Tað sigur MEGD í hoyringssvarinum til lógaruppskotið,  sum skal geva húskjum við lágum inntøkum oljuískoyti. Tørvur er tí á einum breiðari uppskoti, sum er betri fyrireikað, heldur hon.

Sambært uppskotinum hjá landsstýrinum, so kunnu láginntøkubólkar søkja um oljuískoyti, kunnu tey skjalprógva at bústaðurin verður hitaður við olju.

Býr húskið til leigu, sum er íroknað oljunýtslu, skulu tey skjalprógva, at oljuútreiðslur eru partur av leiguni.

Hevur eitt húski hinvegin frían bústað og ikki rindar fyri at hita bústaðin, hevur húski ikki rætt til oljuískoyti, stendur í viðmerkingunum til uppskotið.

Men tað eru ikki bert oljuprísirnir sum eru hækkaðir, og tí kunnu avleiðingarnar fyri fleiri á brekøkinum vera álvarsamar, verður hetta endaligi leisturin, sigur Tóra við Keldu.