- Tíðindi, mentan og ítróttur
Mikhail Gorbatjov er deyður 91 ára gamal
Mikhail Gorbatjov er deyður 91 ára gamal
Seinasti politiski leiðarin í gamla Sovjetsamveldinum, Mihail Gorbatjov, hevði leingið verið sjúkur, nú hann andaðist
Ein eldri útgáva av Mikhail Gorbatjov vð eyðkenda móðurmerkinum á pannuni, sum onkur helt ikki sørt líktiskt Føroyum
Mynd: Ritzau / Scanpix
31.08.2022 - 00:52
Mikhail Gorbatjov var leiðari í Sjovjetsamveldinum frá 1985 til 1991.
Gorbatjov var við í avgerðandi samráðingunum um avdubbing, sum lyfti sonevnda jarnteppið, ið lá tvørtur ígjøgnum Evropa, og sum gjørdist endin á Kalda krígnum.
Mikhail Gorbatjov samráddist við táverandi amerikanska forsetan, Ronald Reagan, og ein avgerandi liður í arbeiðinum at linka spenningin millum eystur og vestur var, at Gorbatjov játtaði at sameina Týskland, og at Eysturevropa bleiv slept úr jarntakinum hjá Sjovetsamveldinum.
Gorbatjov tók eisini sovjetisku herdeildirnar úr Afghanistan.
Í 1990 fekk Mikhail Gorbatjov eisini friðarheiðursløn Nobels fyri at virka fyri friði og avdubbing.
Innanhýsis í Sovjetsamveldinum setti Gorbatjov í verk nakrar reformar, ið fingu heitini Glasnost og Perestrojka, ið skuldu styrka búskapin í Sovjetsamveldinum og føra til gjøgnumskygni, og at Sovjetsamveldið bleiv eitt fólkaræði. Men tað hepnaðist ikki væl.
Reformarnir fóru fyri skeytið, og Sovjetsamveldið fór í upploysn í 1991.
Eftir eitt miseydnað kvett móti Gorbatjov í 1991, ið fekk heitið Augustkvettið, fór hann frá sum aðalskrivari. Og tá hann í 1996 gjørdi enn eina roynd og stillaði upp til russiska forsetavalið, bleiv hann ikki valdur.
Síðani hevur Gorbatjov hildið fyrilestrar og skrivað bøkur.
Mikhail Gorbatjov var 91 ár, nú hann andaðist.
Er kopiera
Nýggjastu sendingar í ÚV
Nýggjastu sendingar í SV
