Putin fylgdi ikki Gorbatjov

Jarðarferðin hjá seinasta leiðaranum í gamla Sovjetsamveldinum, Mikhail Gorbatjov, var fyrr í dag og frammanundan hevði russiski forsetin, Vladimir Putin, boðað frá, at hann fór ikki at fylgja.

- Putin hevur nevniliga ikki fyrigivið Gorbatjov, at Sovjetsamveldið fall, sigur Flemming Splidsboel frá danska stovninum fyri altjóða nám.

Hann sigur, at tí vildi Putin heldur ikki vísa Gorbatjov virðing við at fara til jarðarferðina og samstundis blástempla demokratiska politikkin hjá Gorbatjov. 

Flemming Splidsboel sigur eisini, at tað er heilt týðiligt, at Putin hevur ført eitt heilt annað slag av politikki, ið hevur ført landið á eina meira ódemokratiska leið.

Almenna umberingin hjá Putin var annars, at hann ikki kundi fara at fylgja, tí hann var upptikin av øðrum málum.